महाराष्ट्र पोलिसमध्ये नोकरी मिळवण्याचा प्रयत्न करणाऱ्या तरुणांसाठी आनंदाची बातमी आहे. महाराष्ट्र पोलिस विभागाने कॉन्स्टेबल पदांच्या भरतीसाठी  अधिकृत अधिसूचना जारी केली आहे. या भरती प्रक्रियेअंतर्गत कॉन्स्टेबलच्या 18000 पेक्षा अधिक पदांची बंपर भरती  करण्यात येणार आहे. इच्छुक आणि पात्र उमेदवार ज्यांना या पदांसाठी अर्ज करायचा आहे ते अधिकृत वेबसाइट policerecruitment2022.mahait.org किंवा mahapolice.gov.in वर जाऊन ऑनलाइन अर्ज करू शकतात.

महाराष्ट्र पोलिस विभागाने जारी केलेल्या अधिकृत अधिसूचनेमध्ये दिलेल्या माहितीनुसार, या भरती प्रक्रियेअंतर्गत महाराष्ट्र पोलिस कॉन्स्टेबल, SRPF पोलिस कॉन्स्टेबल आणि ड्रायव्हर पोलिस कॉन्स्टेबल या पदांसाठीच्या तब्बल 18,334 रिक्त जागांसाठी भरती केली जाणार आहे. या भरती प्रक्रियेसाठी ऑनलाईन अर्ज करण्याची प्रक्रिया 9 नोव्हेंबरपासून सुरु झाली आहे. तर 30 नोव्हेंबर 2022 ही अर्ज करण्याची अंतिम तारीख आहे. त्यापूर्वी उमेदवारांनी अर्ज करावा.

रिक्त पदांचा तपशील –

एकूण रिक्त जागा – 18,334 पदं
पोलिस कॉन्स्टेबल – 14956 पदं
SRPF पोलिस कॉन्स्टेबल – 1204 पदं
ड्रायव्हर पोलिस कॉन्स्टेबल – 2174 पदं

शैक्षणिक पात्रता –

या भरती प्रक्रियेसाठी अर्ज करणाऱ्या उमेदवारांनी मान्यताप्राप्त बोर्डातून 12वी उत्तीर्ण असणे आवश्यक आहे. महाराष्ट्र पोलिस ड्रायव्हर पदांसाठी अर्ज करणाऱ्या उमेदवाराकडे ड्रायव्हिंगचा अनुभव असलेले ड्रायव्हिंग लायसन्स अनिवार्य आहे.

वयोमर्यादा –

या पदांसाठी अर्ज करणाऱ्या उमेदवारांचे किमान वय 18 वर्षे आणि कमाल वय 28 वर्षे असणे आवश्यक आहे. तर राखीव प्रवर्गातील उमेदवारांना सरकारी नियमांनुसार उच्च वयोमर्यादेत सवलत दिली जाणार आहे.

असा करा अर्ज –

– उमेदवारांनी policerecruitment2022.mahait.org किंवा mahapolice.gov.in या अधिकृत वेबसाइटला भेट द्यावी.
– आवश्यक तपशील प्रविष्ट करून वेबसाइटवर नोंदणी करावी.
– नोंदणीकृत लॉगिन क्रेडेन्शियल वापरून लॉग इन करा आणि अर्ज भरा.
– अर्जासोबत संबंधित कागदपत्रे अपलोड करा.
– आता फी जमा करा.
– अर्ज डाउनलोड करा आणि प्रिंटआउट घ्या.