मंचर : पुण्यातील आंबेगाव तालुक्यातील अवसरी मंचर येथील एका अभियांत्रिकी महाविद्यालयात एका विद्यार्थ्यावर जीवघेणा हल्ला केल्याची धक्कादायक घटना घडली आहे. एकाच महाविद्यालयातील विद्यार्थ्यांमध्ये शाब्दिक वादातून हा हला करण्यात आला. या हल्ल्यात राहुल हा गंभीर जखमी झाला आहे. तर प्रतिक भोर असं हल्ला केलेल्या विद्यार्थ्याचं नाव आहे. प्रतिकने राहुलवर तिक्ष्ण हत्याराने वार केले आहेत. राहुलवर मंचर येथील रुग्णालयात उपचार सुरु आहेत. राहुल हा खेड तालुक्यातील देव तोरणे गावाचा रहिवासी आहे.
पोलिसांनी दिलेल्या माहितीनुसार, राहुल आवारी आणि प्रतिक भोर हे दोन्ही विद्यार्थी आंबेगाव तालुक्यातील अवसरी येथील अभियांत्रिकी महाविद्यालयामध्ये शिक्षण घेत आहेत. त्यात प्रतिक भोर हा एका कार्यक्रमादरम्यान फोटो काढत होता. त्यावेळी राहुल आवारी हा त्याला म्हणाला की, “वेडे चाळे करून फोटो काढू नकोस”. प्रतिक भोर याला हे बोलणे अपमानास्पद वाटले. त्याचा राग त्याने मनात धरून कटरच्या साह्याने राहुलच्या गळ्यावर आणि तोंडावर सपासप वार केले. राहुलवर रुग्णालयात उपचार सुरू असून या प्रकरणात पोलिसांकडून गुन्हा दाखल करण्यात आला आहे. हल्लेखोर प्रतिक हा आंबेगावचा रहिवासी आहे.
मंचर पोलिसांना याबाबत माहिती मिळताच त्यांनी रुग्णालयात जाऊन राहुल याला घटनेबाबत विचारणा केली. त्यानंतर राहुल याने पोलिसांना संपूर्ण घटना सांगितली. पोलीस याबाबत अधिक तपास करत आहेत. हल्लेखोर विद्यार्थी प्रतिक याला कडक शिक्षा झाली पाहिजे, तरच अशा घटनांना वेळीच आळा बसेल, अशी मागणी पालक व विद्यार्थी करत आहेत. दहशत निर्माण करणाऱ्या मुलांची नावे विद्यार्थ्यांनी आम्हाला सांगावी त्याचे नाव गुप्त ठेवलं जाईल, असं आवाहनही पोलिसांकडून करण्यात आलं आहे.