पुणे : यंदा पुण्यातील विसर्जन मिरवणुकीच्या देखाव्यांवर उंचीची मर्यादा असणार आहे. लकडी पुलावरील मेट्रोच्या कामामुळे रथाचा उंचीवर मर्यादा ठेवण्याचा सूचना प्रशासनाने दिलेल्या आहेत. विसर्जन मिरवणूक दरवर्षी अलका चौकातून लकडी पुलावरून पुढे डेक्कनकडे मार्गस्थ होतात.मेट्रोच्या ब्रिजची उंची 21 फुट असल्याने देखाव्यासह 18 फुटच उंची ठेवण्याच्या सूचना देण्यात आल्या आहेत.पोलीस आणि गणेश मंडळांमध्ये मागील महिन्यात अशाप्रकारची बैठक झाली आहे . सध्या शहरात विविध ठिकाणी विकासकामे सुरू आहेत. अनेक ठिकाणी मेट्रोचे  कामदेखील सुरू आहे.पोलिसांनी त्या अनुषंगाने सूचना केल्या आहेत.

मिरवणुकांच्या मार्गात मेट्रोचा पूल
पुणे मेट्रो शहरातील वनाज ते रामवाडी या मार्गावरून असेल. या मार्ग वरील कामे अद्याप कामे अपूर्ण आहेत.मात्र मेट्रोच्या पुलाचा हा आराखडा तयार करताना विसर्जन मिरवणुका ध्यानात घेण्यात आल्या नाही. विसर्जन मिरवणुका या अलका चौकातून लकडी पुलावरून डेक्कनकडे मार्गस्थ होत असतात.याठिकाणी मिरवणुकांच्या मार्गात मेट्रोचा पूल आहे. वास्तविक हे काम सुरू असताना गणेश मंडळांनी विरोध केला होता. मात्र आराखडा बदलता येणार नाही, असे प्रशासनातर्फे स्पष्ट करण्यात आल्याने त्यावर निर्णय झाला नाही. आता मेट्रोचे काम सुरुही झाले असून काही ठिकाणी ते पूर्णही झाले आहे.

गणेश मंडळांचा हिरमोड
पुणे पोलीस, गणेश मंडळे तसेच मेट्रोच्या अधिकाऱ्यांनी या पुलाच्या ठिकाणची उंची मोजली होती. संभाजी पुलावरील रस्ता तसेच मेट्रोचा पूल यांतील अंतर 21 फूट आहे. दरम्यान, कोरोनाच्या दोन वर्षांनंतर धडाक्यात गणेशोत्सव साजरा होणार असल्याने यंदा गणेश मंडळे वैशिष्ट्यपूर्ण मिरवणुका काढतील, यात शंकाच नाही. मात्र रथाची उंची कमी ठेवावी लागणार असल्याने काहीसा हिरमोड झाल्याचे पाहायला मिळत आहे.