जुन्नर :
‘‘जुन्नर बिबट्या सफारी पाहण्यास चला’ अशा जाहिराती करून पर्यटनाच्या नावाखाली पैसे कमविणाऱ्यांविरोधात गुन्हे दाखल करण्यात येतील,’ असा इशारा जुन्नरचे उपवनसंरक्षक अमोल सातपुते यांनी दिला आहे.
जुन्नरला असलेल्या बिबट्या प्रवण क्षेत्रात राज्य सरकारने बिबट्या सफारी प्रकल्प करण्याची घोषणा केली आहे. या माहितीचा आधार घेऊन काही ‘टूर’ आयोजकांनी जुन्नरला ‘बिबट्या सफारी पाहायला चला…’ अशा जाहिराती सोशल मीडियावर केल्या आहेत. अद्याप सफारी प्रकल्प सुरू झालेला नसताना अशा जाहिराती करून ‘टूर’ आयोजित करण्याचा अजेंडा सुरू आहे. त्यामुळे या भागात पर्यटनाचा बाजार सुरू होण्याची शक्यता असल्याचेही सातपुते म्हणाले. माणिकडोह बिबट्या निवारा केंद्रातील सोयीसुविधांची माहिती देण्यासाठी आयोजित पत्रकार परिषदेत ते बोलत होते. आमदार अतुल बेनके, सहायक वनसंरक्षक अमित भिसे, राहुल पाटील, वन परिक्षेत्र अधिकारी अजित शिंदे, वैभव काकडे, बिबट्या निवारा केंद्राचे पशुवैद्यकीय अधिकारी डॉ. चंदन सावणे, प्रकल्प व्यवस्थापक महेंद्र ढोरे आदी या वेळी उपस्थित होते.
‘प्राणीसंग्रहालयाचाही प्रस्ताव’
‘बिबट्या सफारी प्रकल्प आंबेगव्हाण येथे होणार आहे. या प्रकल्पाचे स्वरूप कसे असेल, याची चित्रफित या वेळी दाखविण्यात आली. बिबट्या निवारा केंद्रात सध्या ३९ बिबटे ठेवण्यात आले आहेत. मात्र, येथे येणाऱ्या बिबट्यांची संख्या जास्त आहे. या पार्श्वभूमीवर वन विभागाने पाटबंधारे विभागाकडे १२ हेक्टर जागेची मागणी केली आहे. येथे येणाऱ्या पर्यटकांना बिबटे पाहता येतील, यासाठी छोटे प्राणीसंग्रहालय उभारण्याचादेखील प्रस्ताव देण्यात आला आहे,’ असे अमोल सातपुते यांनी सांगितले.
‘बिबट्यांसाठी सुसज्ज रुग्णालय’
‘सद्यस्थितीत बिबट्या निवारा केंद्रात केवळ आजारी, जायबंदी आणि जन्मापासून याच ठिकाणी वाढलेल्या बिबट्यांनाच ठेवण्याची व्यवस्था आहे. बिबट्यांवरील उपचारासाठीचे रुग्णालय सर्व सुविधांनी सज्ज आहे. बिबट्या; तसेच अन्य वन्यजीवांवर येथील शस्त्रक्रिया विभागात शस्त्रक्रिया करण्यास सुरुवात झाली आहे. दोन बिबट्यांसह काही वन्यप्राण्यांवरही या ठिकाणी शस्त्रक्रिया झाल्या आहेत,’ असे पशुवैद्यकीय अधिकारी डॉ. चंदन सोवणे यांनी सांगितले.
जाहिरातदारांना समज
‘जुन्नर परिसरातील बिबटे दाखविण्याची जाहिरात करून ‘बिबट्या सफारी पाहायला चला…’ अशा प्रकारच्या जाहिराती नाशिकमधील काही व्यक्तींनी केल्या होत्या. त्यांचा शोध घेऊन या प्रकारचे कृत्य परत करणार नाही, अशा प्रकारचे जबाब त्यांच्याकडून लिहून घेण्यात आले आहेत,’ असे सहायक वनसंरक्षक अमित भिसे यांनी सांगितले.
जुन्नर परिसरात बिबट्यांची संख्या वाढत आहे. मात्र, त्यांची संख्या नियंत्रित करण्याचे कोणतेही धोरण नाही. ही बाब संपूर्णत केंद्र सरकारच्या अखत्यारितील असल्याने त्याबद्दल कोणतेही भाष्य करता येणार नाही.- अमोल सातपुते, उपवनसंरक्षक, जुन्नर वन विभाग