अकोला

अकोल्यामध्ये हत्येची  धक्कादायक घटना समोर आली आहे. ठाकरे गटातील  शिवसेना  उपशहरप्रमुखाच्या हत्येने अकोल्यामध्ये खळबळ उडाली आहे. विशाल कपले यांच्यावर चाकूने सपासप वार करत हत्या करण्यात आली आहे. रविवारी संध्याकाळी ही घटना घडली आहे. या घटनेप्रकरणी अकोला पोलिसांनी  अज्ञात व्यक्तींविरोधात गुन्हा दाखल करत त्यांचा शोध सुरु केला आहे.

अकोला जिल्ह्यात गुन्हेगारीच्या घटना वाढत चालल्या आहेत. काही दिवसांपूर्वीच शिंदे गटातील शिवसेना उपशहर प्रमुखाची गळा दाबून हत्या करण्यात आली होती. ही घटना ताजी असतानाच अकोल्यात ठाकरे गटाच्या उपशहर प्रमुखाची हत्या करण्यात आली आहे. विशाल कपले यांच्यावर दोघांनी चाकूने हल्ला केला. या हल्ल्यात ते गंभीर जखमी झाले. त्यांना उपचारासाठी प्रायव्हेट हॉस्पिटलमध्ये दाखल करण्यात आले. पण उपचारादरम्यान त्यांचा मृत्यू झाला.

मिळालेल्या माहितीनुसार, विशाल कपले यांच्यावर हल्ला पूर्ववैमनस्यातून झाला आहे. अकोला शहरातील जठारपेठ भागातील गणेश स्वीट मार्ट परिसरात त्याच्यावर हल्ला करण्यात आला. हल्ल्यानंतर दोघेही आरोपी फरार झाले. घटनास्थळावर उपस्थित असलेल्या लोकांनी गंभीर जखमी झालेल्या विशाल यांना हॉस्पिटलमध्ये दाखल केले. पण उपचारादरम्यान त्यांचा मृत्यू झाला. विशाल यांच्यावर हल्ला करणारे दोघेही मोठी उमरी परिसरात राहणारे आहेत. रामदास पेठ पोलिसांनी याप्रकरणी दोघांविेरोधात गुन्हा दाखल करत त्यांचा शोध सुरु केला आहे

विशाल कपले हे अकोला शहरामध्ये वेगवेगळे सामाजिक कार्यक्रम राबवायचे. अकोल्या शहरात सुरु असलेल्या अवैध धंद्यांविरोधात त्यांनी आवाज उठवला होता. त्यांनी एका हॉटेलमध्ये सुरु अलेली अवैध दारु विक्रीचा प्रकार समोर आणला होता. त्याचसोबत गांजा तस्करांना देखील त्यांनी पोलिसांच्या हवाली केले होते. याचमुळे गांजा प्रकरणाच्या कारवाईत आपल्याला तुरुंगात जावे लागले याचा राग मनात धरुन कदाचित विशाल यांची हत्या केली असावी असा संशय व्यक्त केला जात आहे.